മംഗളൂരു: ദക്ഷിണ കന്നഡ ജില്ലയിലെ സ്‌കൂളുകളില്‍ ആരോഗ്യ വകുപ്പ് നടത്തിയ പരിശോധനയില്‍ ഞെട്ടിപ്പിക്കുന്ന വിവരം. 5000 ത്തോളം കുട്ടികള്‍ക്ക് കാഴ്ചാ പ്രശ്‌നങ്ങള്‍ കണ്ടെത്തി. 4000 ത്തിലധികം കുട്ടികളും ദിവസവും കണ്ണട ധരിക്കണം. 1,376 സ്‌കൂളുകളിലാണ് ആരോഗ്യ വകുപ്പ് നേത്രപരിശോധന നടത്തിയത്. ഇതില്‍ സര്‍ക്കാര്‍ സ്‌കൂളുകളിലെ 1,01,592 വിദ്യാര്‍ത്ഥികളെയും എയ്ഡഡ് സ്‌കൂളുകളിലെ 44,359 വിദ്യാര്‍ത്ഥികളെയും പരിശോധിച്ചു. ഇതില്‍ 1,106 സര്‍ക്കാര്‍ സ്‌കൂളുകളും 270 എയ്ഡഡ് സ്‌കൂളുകളും ഉള്‍പ്പെടുന്നു. സര്‍ക്കാര്‍ സ്‌കൂളുകളിലെ 3,738 വിദ്യാര്‍ത്ഥികളിലും എയ്ഡഡ് സ്‌കൂളുകളിലെ 660 വിദ്യാര്‍ത്ഥികളിലും കാഴ്ച പ്രശ്‌നങ്ങള്‍ കണ്ടെത്തി. ഇതില്‍ സര്‍ക്കാര്‍ സ്‌കൂളുകളിലെ 3,502 വിദ്യാര്‍ത്ഥികള്‍ക്കും എയ്ഡഡ് സ്‌കൂളുകളിലെ 607 വിദ്യാര്‍ത്ഥികള്‍ക്കും കണ്ണട നല്‍കിയതായി ആരോഗ്യ വകുപ്പ് അധികൃതര്‍ അറിയിച്ചു.
സര്‍ക്കാര്‍, എയ്ഡഡ് സ്‌കൂളുകളിലെ 10 വരെ ക്ലാസ് വരെയുള്ള വിദ്യാര്‍ത്ഥികളിലാണ് പ്രധാനമായും സ്‌ക്രീനിംഗ് കേന്ദ്രീകരിച്ചത്. സ്വകാര്യ സ്‌കൂളുകളിലെ പല കുട്ടികള്‍ക്കും കണ്ണട ആവശ്യമാണെന്ന് റിപ്പോര്‍ട്ടില്‍ പറയുന്നു. സമീപക്കാഴ്ചയും ദീര്‍ഘദൃഷ്ടിയും ഏറ്റവും സാധാരണമായ കാഴ്ച പ്രശ്‌നങ്ങളാണ്. ഈ പ്രശ്‌നങ്ങള്‍ ഒരു നിശ്ചിത പരിധി കവിഞ്ഞുകഴിഞ്ഞാല്‍, നേത്രരോഗ വിദഗ്ധര്‍ കണ്ണടകള്‍ ശുപാര്‍ശ ചെയ്യുന്നുണ്ട്. ചികിത്സിച്ചില്ലെങ്കില്‍, ഗുരുതരമായ കാഴ്ച പ്രശ്‌നങ്ങള്‍ ഉണ്ടാകാനുള്ള സാധ്യതയുണ്ടെന്ന് അധികൃതര്‍ പറയുന്നു. ‘കോവിഡിനു ശേഷമുള്ള മൊബൈല്‍ ഫോണ്‍ ഉപയോഗവും ടിവി കാണുന്ന സമയത്തിലെ വര്‍ദ്ധനവും നേത്ര പ്രശ്‌നങ്ങള്‍ക്ക് ഒരു പ്രധാന കാരണമാകാമെന്ന് ഒരു വിദ്യാര്‍ത്ഥിയുടെ രക്ഷിതാവ് സംശയം പ്രകടിപ്പിച്ചു. മൊബൈല്‍ ഫോണുകളുടെയും ടെലിവിഷനുകളുടെയും മറ്റ് സാങ്കേതികവിദ്യയുടെയും അമിതമായ ഉപയോഗവും അനാരോഗ്യകരമായ ഭക്ഷണശീലങ്ങളും കാഴ്ച വൈകല്യങ്ങള്‍ക്ക് കാരണമാകുന്നുവെന്നാണ് ഡോക്ടര്‍മാര്‍ പറയുന്നത്. കുട്ടികളില്‍ കാഴ്ച പ്രശ്നങ്ങള്‍ ഉണ്ടാകുമ്പോള്‍, ഉടന്‍ തന്നെ ഒരു നേത്രരോഗവിദഗ്ദ്ധനെ സമീപിക്കുന്നതാണ് നല്ലതെന്ന് ഒരു നേത്രരോഗവിദഗ്ദ്ധന്‍ മുന്നറിയിപ്പു നല്‍കുന്നു.