ബംഗ്‌ളൂരു: പ്രായപൂര്‍ത്തിയാകാത്ത മകനു കൈയബദ്ധം പറ്റിയതിനെ തുടര്‍ന്ന് 9 വര്‍ഷമായി ഒളിവില്‍ കഴിയുകയായിരുന്ന കുപ്രസിദ്ധ ക്രിമിനലിനെ പൊലീസ് അറസ്റ്റു ചെയ്തു. ദൊഡ്ഡക്കല്ല സാന്ദ്ര സ്വദേശിയായ മുഹമ്മദ് ഫാറൂഖ് എന്ന മോട്ടി (40)യെ ആണ് മഡിവാള പൊലീസ് അറസ്റ്റു ചെയ്തത്. ബൊമ്മനഹള്ളി, മഡിവാള, കോറമംഗല തുടങ്ങിയ പൊലീസ് സ്റ്റേഷനുകളില്‍ ഇയാള്‍ക്കെതിരെ ആക്രമണം, കവര്‍ച്ച, കൊലപാതക ശ്രമം എന്നിവ ഉള്‍പ്പെടെ നിരവധി കേസുകളുണ്ട്. 2016ല്‍ ജാമ്യത്തില്‍ ഇറങ്ങി മുങ്ങുകയായിരുന്നു. കോടതി പിടികിട്ടാപ്പുള്ളിയായി പ്രഖ്യാപിച്ചുവെങ്കിലും കണ്ടെത്താന്‍ കഴിഞ്ഞില്ല.
ഒളിവില്‍ കഴിയുന്നതിനിടയില്‍ സിദ്ധാപൂര്‍ പൊലീസ് സ്റ്റേഷനിലെ കുപ്രസിദ്ധ റൗഡിയുടെ സഹോദരിയെ പ്രണയിച്ചു കല്യാണം കഴിച്ചു. യുവതി മറ്റൊരു സമുദായക്കാരിയായതിനാല്‍ സ്വന്തം കുടുംബക്കാര്‍ മുഹമ്മദ് ഫാറൂഖിനെ അടുപ്പിച്ചില്ല. ഇതിനിടയില്‍ ഫാറൂഖ് ഭാര്യയുമായി ഒരു ഫ്‌ളാറ്റ് വാടകയ്‌ക്കെടുത്തു താമസം തുടങ്ങി. ഇതിനിടയില്‍ ഒരു മകനും ഉണ്ടായി. സെക്കന്റ് ഹാന്റ് കാറുകള്‍ വില്‍ക്കുന്ന ബിസിനസ് നടത്തിവരുകയായിരുന്നു. ഫോണോ, സോഷ്യല്‍ മീഡിയകളോ ഉപയോഗിക്കാത്തതിനാല്‍ പ്രതിയെ കണ്ടെത്താന്‍ പൊലീസിനു കഴിഞ്ഞില്ല. എന്നാല്‍ മാസങ്ങള്‍ക്കു മുമ്പ് കര്‍ണ്ണാടക വിധാന്‍ സൗധത്തിനു മുന്നില്‍ വച്ച് ഭാര്യയ്ക്കും മകനുമൊപ്പം ഒരു ഫോട്ടോയെടുത്തതാണ് മുഹമ്മദ് ഫാറൂഖിന് വിനയായത്. പ്രസ്തുത ഫോട്ടോ മകന്‍ തന്റെ ഇന്‍സ്റ്റഗ്രാം അക്കൗണ്ടിലേക്ക് പോസ്റ്റു ചെയ്തു. ഈ ഫോട്ടോ അപ്ലോഡ് ചെയ്ത അക്കൗണ്ട് അന്വേഷിച്ചാണ് പിടികിട്ടാപ്പുള്ളിയുടെ ഒളിത്താവളം കണ്ടെത്തി അറസ്റ്റു ചെയ്തത്.
മുണ്ടേമ്മാട്ടെ കല്യാണി അന്തരിച്ചു
Saturday, 5 July 2025, 9:39
