കാസർകോട്: ഭക്ഷ്യവിഷബാധ എന്ന സംശയം ആലമ്പാടി ഹയർ സെക്കൻ്ററി സ്കൂളിലെ നിരവധി വിദ്യാർഥികൾ ആശുപത്രിയിൽ ചികിത്സ തേടി. വ്യാഴാഴ്ച ഉച്ചയ്ക്കു വിതരണം ചെയ്ത പാലും മുട്ടയും കഴിച്ച വിദ്യാർത്ഥികൾക്കാണ് അസ്വസ്ഥത അനുഭവപ്പെട്ടതെന്നു പറയുന്നു. ചെങ്കള ഇ.കെ. നായനാർ ആശുപത്രിയിലും വിദ്യാനഗറിലെ ആശുപത്രികളിലുമാണ് കുട്ടികളെ പ്രവേശിപ്പിച്ചിട്ടുള്ളത്. ഏതാനും കുട്ടികളെ പ്രാഥമിക ശുശ്രൂഷക്കു ശേഷം വിട്ടയച്ചതായും സൂചനയുണ്ട്. സംഭവത്തെ കുറിച്ചു കൂടുതൽ അറിയുന്നതിനു സ്കൂൾ – ആശുപത്രി അധികൃതരുമായി ബന്ധപ്പെടാൻ ശ്രമിച്ചെങ്കിലും അതു പരാജയപ്പെടുകയായിരുന്നു. അതേ സമയം രാവിലെ സ്കൂളിലെത്തിക്കുന്ന പാൽ ഉച്ചക്കാണ് ചൂടാക്കുന്നതെന്നും പാൽ വേണ്ടത്ര ചൂടാക്കാറില്ലെന്നും ആക്ഷേപമുണ്ട്. പാചകപ്പുരയിലെ ശുചിത്വത്തെക്കുറിച്ചും നാട്ടിൽ വ്യത്യസ്ത അഭിപ്രായമാണ്. അതേസമയം പാലും മുട്ടയും ഉപയോഗിച്ച എല്ലാ കുട്ടികൾക്കും ദേഹാസ്വാസ്ഥ്യം അനുഭവപ്പെട്ടിട്ടില്ലെന്നു മറ്റു ചിലർ ചുണ്ടിക്കാട്ടി.