ലഖ്‌നൗ: പശുത്തൊഴുത്ത് വൃത്തിയാക്കി അതില്‍ കിടന്ന് കാന്‍സര്‍ രോഗികള്‍ക്ക് സ്വയം രോഗം സുഖപ്പെടുത്താമെന്ന വിവാദ പരാമര്‍ശവുമായി യുപി മന്ത്രി സഞ്ജയ് സിങ് ഗാങ്വര്‍. 10 ദിവസം പശുക്കളെ ലാളിച്ചും സേവിച്ചും രക്തസമ്മര്‍ദ്ദത്തിനുള്ള മരുന്നുകള്‍ വെട്ടിക്കുറയ്ക്കാമെന്നും കരിമ്പ് വികസന വകുപ്പിലെ മന്ത്രി പറഞ്ഞു. പകാഡിയ നൗഗവനില്‍ ഗോശാല ഉദ്ഘാടന വേളയിലായിരുന്നു പരാമര്‍ശം.
വിവാഹ വാര്‍ഷികവും കുട്ടികളുടെ ജന്മദിനവും ഗോശാലകളില്‍ ആഘോഷിക്കണമെന്നും മന്ത്രി ജനങ്ങളോട് അഭ്യര്‍ത്ഥിച്ചു. ‘രക്തസമ്മര്‍ദ്ദമുള്ള രോഗിയുണ്ടെങ്കില്‍ ആ വ്യക്തി എല്ലാ ദിവസവും രാവിലെയും വൈകുന്നേരവും പശുവിനെ അതിന്റെ മുതുകില്‍ സ്പര്‍ശിച്ചാല്‍ ഗുളിക കഴിക്കുന്നത് കുറക്കാം. ഒരു കാന്‍സര്‍ രോഗി പശുത്തൊഴുത്ത് വൃത്തിയാക്കി അതില്‍ കിടന്നാല്‍ ക്യാന്‍സര്‍ പോലും ഭേദമാകും. ചാണക പിണ്ണാക്ക് കത്തിച്ചാല്‍ കൊതുക് ശല്യം ഇല്ലാതാകും. പശു ഉത്പാദിപ്പിക്കുന്നതെല്ലാം ഒരു തരത്തില്‍ ഉപയോഗപ്രദമാണ്’- മന്ത്രി പറഞ്ഞു. പിലിഭിത്തിലെ നോഗ്വ പക്ദിയയില്‍ 55 ലക്ഷം രൂപ ചെലവിലാണ് കന്‍ഹ ഗോശാല നിര്‍മ്മിച്ചിരിക്കുന്നത്.
2012ലെ നിയമസഭാ തിരഞ്ഞെടുപ്പില്‍ ബിഎസ്പി ടിക്കറ്റില്‍ ഗാങ്വര്‍ മത്സരിച്ചെങ്കിലും പരാജയപ്പെട്ടു. 2017ല്‍ അദ്ദേഹം ബിജെപിയില്‍ ചേര്‍ന്ന് പിലിഭിത്തില്‍ നിന്ന് വിജയിച്ചു മന്ത്രിയാവുകയായിരുന്നു.
അവശനിലയില്‍ ആശുപത്രിയില്‍ പ്രവേശിപ്പിക്കപ്പെട്ട ആള്‍ മരണപ്പെട്ടു
Sunday, 8 June 2025, 15:46
