കാസര്കോട്: ഷിറിയ പുഴയില് ഒളയത്ത് അനധികൃതമായി പ്രവര്ത്തിക്കുന്ന കടവ് പൊലീസ് തകര്ത്തു. കടവില് ഉണ്ടായിരുന്ന തോണിയും ജെ.സി.ബി ഉപയോഗിച്ച് തകര്ത്തു. സ്ഥലത്തു കൂട്ടിയിട്ടിരുന്ന 15 ലോഡ് മണല് ജെ.സി.ബി ഉപയോഗിച്ച് പുഴയിലേക്കു തന്നെ തള്ളി. തിങ്കളാഴ്ച രാത്രി കുമ്പള പൊലീസ് ഇന്സ്പെക്ടര് കെ.പി വിനോദ് കുമാര്, എസ്.ഐ കെ. ശ്രീജേഷ്, എ.എസ്.ഐ പ്രദീപ്, സി.പി.ഒ മനോജ് എന്നിവരാണ് അനധികൃത കടവ് തകര്ത്തത്. വരും ദിവസങ്ങളിലും അനധികൃത മണല്ക്കടത്തിനെതിരെ ശക്തമായ നടപടി തുടരുമെന്ന് പൊലീസ് പറഞ്ഞു.
