ചെന്നൈ: പ്രശസ്ത സിനിമ മേക്കപ്പ്മാന്‍ പാണ്ഡ്യന്‍ അന്തരിച്ചു. 74 വയസായിരുന്നു. ചെന്നൈ വിരുഗമ്പാക്കത്തെ വസതിയിലായിരുന്നു അന്ത്യം. മലയാളം, കന്നഡ, തമിഴ്, തെലുങ്കിലെ അഞ്ഞൂറോളം ചിത്രങ്ങളില്‍ മേക്കപ്പ് മാനായി പ്രവര്‍ത്തിച്ചു. 2001 ല്‍ കമല്‍ സംവിധാനം ചെയ്ത ‘മധുരനൊമ്പരക്കാറ്റ്’ എന്ന ചിത്രത്തിലെ ചമയത്തിന് അദ്ദേഹത്തിന് സംസ്ഥാന ചലച്ചിത്രപുരസ്‌കാരം ലഭിച്ചിരുന്നു. മലയാളത്തിനുപുറമെ തെലുങ്ക് താരങ്ങളായ എന്‍.ടി.ആര്‍, എസ്.വി.ആര്‍, കൃഷ്ണ തുടങ്ങിയവര്‍ക്കൊപ്പവും തമിഴില്‍ രജനികാന്ത്, കമലഹാസന്‍ തുടങ്ങിയവര്‍ക്കൊപ്പവും പാണ്ഡ്യന്‍ പ്രവര്‍ത്തിച്ചിട്ടുണ്ട്. സത്യന്‍ അന്തിക്കാട് സംവിധാനം ചെയ്ത ഹൃദയപൂര്‍വം ആയിരുന്നു അവസാന ചിത്രം. കമല്‍ സംവിധാനം ചെയ്യുന്ന ‘വിവേകാനന്ദന്‍ വൈറലാണ്’ എന്ന ചിത്രത്തിന്റെ ലൊക്കേഷനില്‍ വെച്ച് കേക്ക് മുറിച്ചും പാണ്ഡ്യനെ പൊന്നാടയണിയിച്ച് ആദരിച്ചിരുന്നു. തമിഴ്‌നാട് സ്വദേശിയായ പാണ്ഡ്യന്‍ തന്റെ പതിനാറാം വയസിലാണ് നടന്‍ സത്യന്റെ പേഴ്സണല്‍ മേക്കപ്പ്മാനായ കൃഷ്ണരാജന്റെ സഹായിയായി
മലയാളസിനിമയിലേക്ക് എത്തുന്നത്. പ്രശസ്ത ഛായാഗ്രാഹകന്‍ ജെ വില്യംസിന്റെ സഹായിയായും പ്രവര്‍ത്തിച്ചിരുന്നു. പല ചിത്രങ്ങളിലും പ്രവര്‍ത്തിച്ച അദ്ദേഹം അതിനിടെ തമിഴില്‍ അസ്സിസ്റ്റന്റ് എഡിറ്ററായും പ്രവര്‍ത്തിച്ചിരുന്നു. 1972 ല്‍ പുറത്തിറങ്ങിയ പുള്ളിമാന്‍ എന്ന ചിത്രത്തില്‍ എം ഒ ദേവസ്യയുടെ സഹായിയായി പ്രവര്‍ത്തിച്ചു. തുടര്‍ന്നുള്ള വര്‍ഷങ്ങളില്‍ മലയാളം, തമിഴ് തെലുങ്ക്, കന്നഡ എന്നീ ഭാഷകളില്‍ ഒരുപാട് ചിത്രങ്ങളില്‍ ചമയം സഹായിയായി അദ്ദേഹം പ്രവര്‍ത്തിച്ചു. 1978-ല്‍ ജെ വില്യംസ് കഥയെഴുതി സംവിധാനം ചെയ്ത ‘മദാലസ’യിലാണ് സ്വതന്ത്ര മേക്കപ്പ്മാനായി. തുടര്‍ന്നുള്ള കാലം മിക്ക പ്രമുഖ സൗത്ത് ഇന്ത്യന്‍ താരങ്ങളുടെയും മുഖം മിനുക്കാന്‍ അദ്ദേഹത്തിനു കഴിയുകയുണ്ടായി. കമല്‍, സത്യന്‍ അന്തിക്കാട്, ജോഷി തുടങ്ങിയ സംവിധായകരുടെ ചിത്രങ്ങളിലെ സ്ഥിരം ചമയക്കാരനായിരുന്നു. ലക്ഷ്മിയാണ് ഭാര്യ. മക്കള്‍: അനിത, തന്നു.
