കണ്ണൂര്‍: സിപിഎമ്മുമായുള്ള അകല്‍ച്ച പ്രകടമാക്കുന്ന ഫേയ്‌സ്ബുക്ക് കുറിപ്പുമായി കണ്ണൂര്‍ ജില്ലാ പഞ്ചായത്ത് മുന്‍ പ്രസിഡന്റും സിപിഎം നേതാവുമായിരുന്ന പി.പി. ദിവ്യ. ഒരിക്കല്‍ ശരിയെന്ന് തോന്നിയത് എക്കാലവും ശരിയാവണമെന്നില്ലെന്നാണ് പിപി ദിവ്യയുടെ ഫേസ്ബുക്ക് കുറിപ്പ്. ഒരു കരയില്‍ നിന്നും മറു കരയില്‍ എത്താന്‍ സഹായിച്ചതിനെ ജീവിതകാലം മുഴുവന്‍ ചുമന്ന് നടക്കേണ്ടതില്ല, അതിനെ ഉപേക്ഷിക്കുന്നത് നന്ദികേടല്ല, ചിലതിനോട് നാം നന്ദിയുള്ളവരായിരിക്കണം, ചിലതിനെ സ്‌നേഹത്തോടെ യാത്രയാക്കണം, പങ്കുവയ്ക്കുന്നത് വെറും സങ്കല്‍പ്പകഥകളല്ല, ജീവിതയാത്രയില്‍ കണ്ടുമുട്ടിയ മനുഷ്യരും അനുഭവിച്ച സാഹചര്യങ്ങളും മനസ്സില്‍ അവശേഷിപ്പിച്ച ചിന്തകളും ചോദ്യങ്ങളുമാണ്, ജീവിതം പഠിപ്പിച്ച പാഠമാണതെന്നും പിപി ദിവ്യ ഫേസ്ബുക്കില്‍ കുറിക്കുന്നത്. ബുദ്ധന്റെ കഥ സൂചിപ്പിച്ചുകൊണ്ടാണ് ദിവ്യയുടെ ഫേസ്ബുക്ക് കുറിപ്പ്. കണ്ണൂര്‍ എ.ഡി.എം. ആയിരുന്ന കെ. നവീന്‍ ബാബുവിന്റെ ആത്മഹത്യയുമായി ബന്ധപ്പെട്ട വിവാദത്തെ തുടര്‍ന്ന്ജില്ലാ പഞ്ചായത്ത് പ്രസിഡന്റ് സ്ഥാനംപി.പി. ദിവ്യ രാജിവച്ചിരുന്നു. അടുത്തിടെ നടന്ന സി.പി.എം കണ്ണൂര്‍ വിശാല ജില്ലാ കമ്മിറ്റി യോഗത്തിലും ദിവ്യയ്ക്ക് പരിഗണനയൊന്നും ലഭിച്ചിരുന്നില്ല. ദിവ്യയെ പാര്‍ട്ടി ജില്ലാ കമ്മിറ്റിയില്‍ തിരികെ എത്തിക്കാന്‍ ഒരു വിഭാഗം നേതാക്കള്‍ നീക്കം നടത്തിയിരുന്നു. അത് പരാജയപെട്ടതിന് പിന്നാലെയാണ് പിപി ദിവ്യയുടെ ഫേസ്ബുക്ക് പോസ്റ്റ്.

ഫേസ്ബുക്ക് പോസ്റ്റിന്റെ പൂര്‍ണരൂപം

ഓരോ ജീവിതത്തിനും പറയാന്‍ ഒരു കഥയുണ്ട്…
ഓരോ കഥയിലും തിരിച്ചറിയാന്‍ ഒരു സത്യവും.
ജീവിതത്തിന്റെ ഏതോ വഴിത്തിരിവില്‍ കണ്ടുമുട്ടിയ മനുഷ്യര്‍… കടന്നുപോയ സാഹചര്യങ്ങള്‍… ഹൃദയത്തില്‍ മായാതെ കിടക്കുന്ന ചില ഓര്‍മ്മകള്‍… കാലം മായ്ച്ചുകളയാത്ത ചില മുറിവുകള്‍… ഇതെല്ലാം മനസ്സില്‍ അവശേഷിപ്പിച്ച ചിന്തകളുണ്ട്.
ചില അനുഭവങ്ങള്‍ ചിരിയുടെ പൂക്കാലം സമ്മാനിച്ചു. ചിലത് കണ്ണീരിന്റെ നനവുള്ള ഓര്‍മ്മകളായി മാറി. മറ്റു ചിലത് മനുഷ്യരെ തിരിച്ചറിയാനും ബന്ധങ്ങളുടെ ആഴം അളക്കാനും സത്യത്തിന്റെയും നീതിയുടെയും വില മനസ്സിലാക്കാനും പഠിപ്പിച്ചു.
അങ്ങനെയിരിക്കെ, അടുത്തിടെ വായിച്ച ഒരു കഥ മനസ്സില്‍ ആഴത്തില്‍ പതിഞ്ഞു. ബുദ്ധന്‍ തന്റെ ശിഷ്യന്മാരോട് പറഞ്ഞതായി കേട്ടിട്ടുള്ള ഒരു കഥ…
ഒരു മനുഷ്യന്‍ യാത്രയ്ക്കിടയില്‍ ആഴമേറിയ ഒരു നദിക്കരയിലെത്തി. മറുകരയിലെത്താന്‍ പാലമില്ല, വള്ളമില്ല, സഹായിക്കാന്‍ ആരുമില്ല. ഒടുവില്‍ അവിടെക്കണ്ട മരത്തടികളും കമ്പുകളും ചേര്‍ത്ത് അയാള്‍ ഒരു ചങ്ങാടമുണ്ടാക്കി. പ്രതിബന്ധങ്ങളെ അതിജീവിച്ച് സുരക്ഷിതമായി മറുകരയിലെത്തി.
തന്റെ ജീവന്‍ രക്ഷിക്കാന്‍ സഹായിച്ച ആ ചങ്ങാടത്തോട് അയാള്‍ക്ക് വല്ലാത്ത നന്ദി തോന്നി. അതിനെ ഉപേക്ഷിക്കാന്‍ മനസ്സുവരാതെ, ഇനി എവിടെപ്പോയാലും ചങ്ങാടം കൂടെ കൊണ്ടുപോകാന്‍ അയാള്‍ തീരുമാനിച്ചു. അങ്ങനെ, യാത്ര സുഗമമാക്കിയ ആ ചങ്ങാടം തലയിലേറ്റി അയാള്‍ വീണ്ടും യാത്ര തുടര്‍ന്നു.
കഥ പറഞ്ഞുതീര്‍ത്ത ബുദ്ധന്‍ ശിഷ്യന്മാരോട് ചോദിച്ചു:
”അയാള്‍ ചെയ്യുന്നത് ശരിയാണോ?”
ശിഷ്യന്മാര്‍ ഒരേ സ്വരത്തില്‍ പറഞ്ഞു: ”അല്ല.”
ഒന്ന് ആലോചിച്ചുനോക്കൂ… നമ്മുടെ ജീവിതത്തിലും ഇങ്ങനെയുള്ള ചില ചങ്ങാടങ്ങളില്ലേ?
ഒരിക്കല്‍ നമ്മെ ചേര്‍ത്തുപിടിച്ച ചില ബന്ധങ്ങള്‍ ഇന്ന് നമ്മെ വേദനിപ്പിക്കുന്നുണ്ടാകാം. ഒരുകാലത്ത് തുണയായിരുന്ന ചില ശീലങ്ങള്‍ ഇന്ന് നമ്മുടെ മുന്നോട്ടുള്ള യാത്രയ്ക്ക് തടസ്സമാകുന്നുണ്ടാകാം. ഒരിക്കല്‍ നമുക്ക് ശരിയെന്നു തോന്നിയതെല്ലാം എക്കാലവും ശരിയായിരിക്കണമെന്നില്ല.
ചിലതിനോട് നാം നന്ദിയുള്ളവരായിരിക്കണം… ചിലതിനെ സ്‌നേഹത്തോടെ യാത്രയാക്കണം.
നമ്മെ ഒരു കരയില്‍നിന്ന് മറ്റൊരു കരയിലേക്ക് എത്തിക്കാന്‍ സഹായിച്ച ചങ്ങാടത്തെ ജീവിതകാലം മുഴുവന്‍ ചുമന്നുനടക്കേണ്ടതില്ല. അതിനെ ഉപേക്ഷിക്കുന്നത് നന്ദികേടല്ല; മറിച്ച്, ജീവിതം നമ്മെ പഠിപ്പിച്ച പാഠത്തെ തിരിച്ചറിയലാണ്.
ജീവിതത്തിലും അങ്ങനെതന്നെ… ചില മനുഷ്യര്‍ നമ്മുടെ ജീവിതത്തിലേക്ക് കടന്നുവരുന്നത് ഒരു പാഠം പഠിപ്പിക്കാനായിരിക്കാം. ചില അനുഭവങ്ങള്‍ നമ്മെ തകര്‍ക്കാനല്ല, കൂടുതല്‍ കരുത്തുള്ളവരാക്കാനായിരിക്കാം. ചില വേര്‍പിരിയലുകള്‍ നഷ്ടങ്ങളല്ല; പുതിയ വഴികളിലേക്കുള്ള തുടക്കങ്ങളായിരിക്കാം.
എല്ലാറ്റിനെയും മുറുകെപ്പിടിക്കുന്നതല്ല ജീവിതം; വിട്ടുപോകേണ്ടതിനെ തിരിച്ചറിയാനുള്ള വിവേകം കൂടിയാണ് ജീവിതം.
പ്രിയ സുഹൃത്തുക്കളേ,
ഇവിടെ ഞാന്‍ പങ്കുവയ്ക്കുന്നത് വെറും സങ്കല്‍പ്പകഥകളല്ല. ജീവിതയാത്രയില്‍ കണ്ടുമുട്ടിയ മനുഷ്യരും അനുഭവിച്ച സാഹചര്യങ്ങളും മനസ്സില്‍ അവശേഷിപ്പിച്ച ചിന്തകളും ചോദ്യങ്ങളുമാണ്. ചില കഥകളില്‍ നിങ്ങള്‍ക്ക് പരിചിതമായ മുഖങ്ങള്‍ തെളിഞ്ഞേക്കാം. ചില അനുഭവങ്ങളില്‍ നിങ്ങളുടെ തന്നെ ജീവിതത്തിന്റെ നിഴലുകള്‍ കണ്ടേക്കാം.
ഓര്‍മ്മകളുടെ വഴികളിലൂടെ… മനുഷ്യബന്ധങ്ങളുടെ ഉള്ളറകളിലൂടെ… സത്യത്തിന്റെയും നീതിയുടെയും അര്‍ത്ഥങ്ങള്‍ തേടി ഒരു യാത്ര.
കാരണം, ഓരോ കഥയ്ക്കു പിന്നിലും ഒരു ജീവിതമുണ്ട്… ഓരോ ജീവിതത്തിനുള്ളിലും പറയാതെപോയ ഒരു സത്യവും.
”Justice may be delayed, but the voice of truth will never fade.’ ??
സത്യം പറയാനുള്ള ധൈര്യത്തോടെയും നീതി തിരിച്ചറിയാനുള്ള വിവേകത്തോടെയും… ഈ യാത്ര ഇവിടെ തുടരുന്നു. ..വായിക്കണം. ..അഭിപ്രായങ്ങള്‍ അറിയിക്കണം