തൃക്കരിപ്പൂര്‍: ഒറ്റയ്ക്ക് താമസിക്കുന്ന സ്ത്രീയെ വീട്ടില്‍ മരിച്ച നിലയില്‍ കണ്ടെത്തിയ സംഭവത്തിലെ ദുരൂഹത നീങ്ങി. എടാട്ടുമ്മല്‍ മുണ്ട്യക്കാവിന് സമീപം താമസിക്കുന്ന പി ഭാരതി(60) മരിച്ചത് ഹൃദയാഘാതം മൂലമാണെന്ന് പ്രാഥമിക പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നു. ഹൃദയത്തില്‍ മൂന്നു ബ്ലോക്കുണ്ടായിരുന്നുവന്നും റിപ്പോര്‍ട്ടിലുണ്ട്. പരിയാരം കണ്ണൂര്‍ ഗവ.മെഡിക്കല്‍ കോളേജിലാണ് പോസ്റ്റുമോര്‍ട്ടം നടന്നത്. പഴയകാല ഫുട്‌ബോള്‍ താരമായിരുന്നു ഭാരതി. ശനിയാഴ്ച രാവിലെയാണ് ഇവരെ വീട്ടിനകത്ത് മരിച്ച നിലയില്‍ കണ്ടെത്തിയത്. മൃതദേഹത്തിന് രണ്ടുദിവസത്തിലധികം പഴക്കമുണ്ടായിരുന്നു. വാതില്‍ തുറന്നുകിടക്കുന്ന നിലയിലായിരുന്നു. കൂടാതെ സിറ്റൗട്ടിലാണ് മൃതദേഹമുണ്ടായിരുന്നത്. തലയുടെ ഭാഗത്ത് കണ്ട രക്തക്കറ സംശയത്തിനിടയാക്കി. ഡോഗ് സ്‌ക്വാഡും സ്ഥലത്തെത്തിയിരുന്നു. മൃതദേഹം ബന്ധുക്കള്‍ക്ക് വിട്ടു നല്‍കി. സംസ്‌കാരം വൈകുന്നേരം നടക്കും.