കാസര്‍കോട്: ഭര്‍തൃമതിയായ യുവതിയുടെ വീട്ടില്‍ സദാചാര പൊലീസ് ചമഞ്ഞ് അതിക്രമിച്ച് കയറി യുവതിയെയും ആണ്‍ സുഹൃത്തിനെയും ഭീഷണിപ്പെടുത്തി പണവും സ്വര്‍ണവും കവര്‍ന്ന കേസില്‍ അഞ്ചംഗ സംഘം അറസ്റ്റില്‍. മുളിയാര്‍ പൊവ്വലിലെ ബി ഷറീഫ് (42), ചെങ്കള സന്തോഷ് നഗറിലെ മുഹമ്മദ് സാലിഹ് (22), നാലാം മൈല്‍ സ്വദേശികളായ ഉമര്‍ മുഖ്താര്‍ (18), മുഹമ്മദ് ഷിഹാന്‍ (20), ആലംപാടിയിലെ അബ്ദുല്‍ റഷീദ് (36) എന്നിവരെയാണ് വിദ്യാനഗര്‍ പൊലീസ് അറസ്റ്റുചെയ്തത്. കോടതിയില്‍ ഹാജരാക്കിയ പ്രതികളെ റിമാന്റുചെയ്തു. കഴിഞ്ഞ ജൂലൈ 21-നാണ് കേസിനാസ്പദമായ സംഭവം നടന്നത്.
യുവതിയുടെ വീട്ടിലെത്തിയ ആണ്‍ സുഹൃത്തിനെയും യുവതിയെയും ചേര്‍ത്തുനിര്‍ത്തി ഫോട്ടോ എടുക്കുകയും ഇത് പുറത്തുവിടുമെന്ന് ഭീഷണിപ്പെടുത്തി പണം ആവശ്യപ്പെടുകയും ചെയ്യുകയായിരുന്നു.
യുവതിയുടെ രണ്ട് പവന്‍ തൂക്കം വരുന്ന സ്വര്‍ണമാല, മോതിരം, 15,000 രൂപ എന്നിവ ആദ്യം കൈക്കലാക്കി.
പിന്നീട് ആണ്‍ സുഹൃത്തില്‍ നിന്ന് 40,000 രൂപയും സംഘം കൈക്കലാക്കിയെന്നാണ് കേസ്. സംഭവത്തിന് ശേഷവും കൂടുതല്‍ പണവും സ്വര്‍ണവും ആവശ്യപ്പെട്ട് ഭീഷണിപ്പെടുത്തിയതോടെയാണ് യുവതി പൊലിസിനെ സമീപിച്ചത്. തന്ത്രപരമായ നീക്കത്തിലൂടെ വിദ്യാനഗര്‍ ഇന്‍സ്‌പെക്ടര്‍ പി പ്രമോദിന്റെ നേതൃത്വത്തിലുള്ള പൊലീസ് പ്രതികളെ പിടികൂടുകയായിരുന്നു. വീട്ടില്‍ അതിക്രമിച്ചുകയറല്‍, ഭീഷണിപ്പെടുത്തി പണം തട്ടിയെടുക്കല്‍, കവര്‍ച്ച തുടങ്ങിയ വകുപ്പുകള്‍ ഉള്‍പ്പെടുത്തിയാണ് പൊലീസ് കേസെടുത്തത്.
17 കാരിയെ പീഡിപ്പിച്ചു; പിന്നാലെ മാതാവിനൊപ്പം ഒളിച്ചോടി; ജസല് തങ്ങള് മഞ്ചേശ്വരത്ത് അറസ്റ്റില്‍
Friday, 16 October 2026, 16:33
