കാസർകോട്: നെല്ലിക്കട്ട അതൃക്കുഴിക്ക് സമീപം ഓടിക്കൊണ്ടിരിക്കുന്ന കാറിന് തീ പിടിച്ചു. കാർ പൂർണ്ണമായും കത്തി നശിച്ചു. ഡ്രൈവർ അത്ഭുതകരമായ രക്ഷപ്പെട്ടു. കാസർകോട് സ്വദേശി വിനോദിന്റെ മാരുതി ആൾട്ടോ കാറിനാണ് തീ പിടിച്ചത്. വെള്ളിയാഴ്ച രാത്രി എട്ടുമണിയോടെയാണ് സംഭവം. കാർ അതൃക്കുഴി കയറ്റത്തിൽ വച്ച് എൻജിനിൽ തീ പിടിക്കുകയായിരുന്നു. തുടർന്ന് കാർ ഓടിച്ചിരുന്ന അഷ്റഫ് ബ്രേക്ക് ചവിട്ടിയിട്ടും വാഹനത്തിനെ നിയന്ത്രിക്കാനായില്ല. നിയന്ത്രണം വിട്ട കാർ പിറകിലോട്ട് വന്ന് അടുത്തുള്ള കോൺക്രീറ്റ് തൂണിൽ ഇടിച്ചുനിൽക്കുകയായിരുന്നു. തീ ആളിക്കത്തുന്നത് കണ്ട് സീറ്റ് ബെൽറ്റ് അഴിച്ച് പെട്ടെന്ന് തന്നെ ഡ്രൈവർ പുറത്തിറങ്ങിയതിനാൽ ആളപായമില്ല. അപ്പോഴേക്കും കാറിന് വലിയതോതിൽ തീ പിടിച്ചിരുന്നു. വിവരത്തെ തുടർന്ന് കാസർകോട് അഗ്നിരക്ഷാ നിലയത്തിൽ നിന്നും സീനിയർ ഫയർ ആൻഡ് റെസ്ക്യൂ ഓഫീസർ സുകു വർഗീസിന്റെ നേതൃത്വത്തിൽ സേന തീ അണച്ചു. ഫയർ ആൻഡ് റെസ്ക്യൂ ഓഫീസർമാരായ അമൽ, സിറാജുദ്ദീൻ, വൈശാഖ്, ഡ്രൈവർ പ്രസീത് ഇ, ഹോം ഗാർഡുമാരായ രാജേന്ദ്രൻ എ, ശ്രീജിത്ത് പി എന്നിവരും ദൗത്യത്തിൽ പങ്കെടുത്തു. ഷോർട്ട് സർക്യൂട്ട് ആയിരിക്കാം തീപിടുത്തത്തിന് കാരണമെന്ന് അഗ്നിരക്ഷാസേന അറിയിച്ചു.