കാസർകോട്: കളക്ടർ സ്ഥാനമൊഴിഞ്ഞ അർജുൻ പാണ്ഡ്യൻ ചടങ്ങിനു ശേഷം നേരെ പോയത് വൃദ്ധസദനത്തിലെ അന്തേവാസികളെ കാണാൻ. പരവനടുക്കം ഗവ വൃദ്ധസദനത്തിലെ അന്തേവാസികളെയും കൂട്ടി അദ്ദേഹം കോട്ടപ്പുറം ഹൗസ് ബോട്ടിൽ വലിയ പറമ്പ് കായലിൽ യാത്ര നടത്തി. കഴിഞ്ഞ ദിവസം ഈ വൃദ്ധ സദനം സന്ദർശിച്ചപ്പോൾ അമ്മമാർ യാത്ര ചെയ്യാൻ ആഗ്രഹമുണ്ടെന്നും അതിൽ ഒരമ്മ ബോട്ടിൽ യാത്ര ചെയ്തിട്ടില്ലെന്നും അദ്ദേഹത്തെ അറിയിച്ചിരുന്നു. ഈ ആഗ്രഹം സഫലീകരണത്തിനായാണ് തിരക്കുകൾക്കിടയിലും അവർക്ക് വേണ്ടി അർജുൻ പാണ്ഡ്യൻ സമയം മാറ്റിവെച്ചത്. നിറഞ്ഞ സന്തോഷത്തോടെ അവർ 25 പേരും ഹൗസ് ബോട്ട് യാത്ര അവിസ്മരണീയമാക്കി. മകനെന്ന പോലെ മുൻകളക്ടർ വയോജനങ്ങളെ ചേർത്തു നിർത്തി. ജില്ലയിലെ ലീഡ് ബാങ്കായ കാനറാബാങ്കാണ് യാത്രയ്ക്കാവശ്യമായ സൗകര്യങ്ങൾ ഒരുക്കിയത്. ജില്ലാ സാമൂഹിക നീതി ഓഫീസർ സേവ്യർ, ഗവ. കോളജിലെ പത്ത് എൻ എസ് എസ് വളണ്ടിയർമാരും ജില്ലാ കളക്ടറുടെ ഇൻ്റേൺസും ഉല്ലാസയാത്രയിൽ പങ്കെടുത്തു.
