മംഗളൂരു: ശ്രീകൃഷ്ണ ജയന്തി ആഘോഷങ്ങളുടെ ഭാഗമായി ഭജന അവതരിപ്പിക്കുന്നതിനിടെ ഗായകന്‍ കുഴഞ്ഞുവീണുമരിച്ചു. വെള്ളിയാഴ്ച രാത്രി 11 മണിയോടെ മംഗളൂരു തോക്കൂര്‍ സുബ്രഹ്‌മണ്യ ക്ഷേത്രത്തിലെ ആഘോഷങ്ങള്‍ക്കിടെയാണ് സംഭവം. തോക്കൂര്‍ സ്വദേശിയായ ശ്രീനാഥ് ഷെട്ടിഗാര്‍ (38) ആണ് മരിച്ചത്. ഭജനക്കിടെ കുഴഞ്ഞുവീണ ഗായകനെ ആശുപത്രിയിലെത്തിച്ചെങ്കിലും മരിച്ചിരുന്നു. മൃതദേഹം ആശുപത്രി മോര്‍ച്ചറിയിലേക്ക് മാറ്റി. ബെംഗളൂരുവില്‍ ജോലി ചെയ്തിരുന്ന ശ്രീനാഥ് ജന്മാഷ്ടമിക്ക് സ്വന്തം നാട്ടിലേക്ക് മടങ്ങിയെത്തിയിരുന്നു. ശ്രീനാഥിന്റെ അപ്രതീക്ഷിത മരണം കുടുംബാംഗങ്ങളെയും സുഹൃത്തുക്കളെയും ദുഃഖത്തിലാഴ്ത്തി.