പി പി ചെറിയാൻ
വാഷിംഗ്ടൺ ഡി സി : ചൈനയിൽ നിന്നുള്ള ഭീഷണികളെ ഫലപ്രദമായി നേരിടാൻ ഇന്ത്യയും അമേരിക്കയും തമ്മിലുള്ള പങ്കാളിത്തം കൂടുതൽ ശക്തിപ്പെടുത്തണമെന്ന് ഇന്ത്യൻ വംശജനായ യു.എസ് കോൺഗ്രസ് അംഗം രാജാ കൃഷ്ണമൂർത്തി അഭിപ്രായപ്പെട്ടു.
കൃത്രിമബുദ്ധി (എ ഐ ), ക്വാണ്ടം കമ്പ്യൂട്ടിംഗ്, ഫ്യൂഷൻ എനർജി, സോളാർ പവർ, സുരക്ഷാ മേഖലകൾ എന്നിവയിൽ ഇരുരാജ്യങ്ങളും കൈകോർക്കണമെന്ന് അദ്ദേഹം ആവശ്യപ്പെട്ടു. കാലഘട്ടത്തിലെ ഏറ്റവും വലിയ വെല്ലുവിളിയാണ് ചൈന ഉയർത്തുന്നത്. ഈ വെല്ലുവിളിയെ നേരിടാൻ ഇരുരാജ്യങ്ങളും ഇനിയും കൂടുതൽ കാര്യങ്ങൾ ചെയ്യാനുണ്ടെന്ന് അദ്ദേഹം വ്യക്തമാക്കി.ആഭ്യന്തര വിവേചനങ്ങളും ഭിന്നതകളും കുറച്ച് ജനാധിപത്യം ശക്തിപ്പെടുത്തണം.
എച്ച്-1ബി വിസ ഉടമകളും പതിറ്റാണ്ടുകളായി ഗ്രീൻ കാർഡിനായി കാത്തിരിക്കുന്നവരുമായ ഇന്ത്യൻ പ്രൊഫഷണലുകൾക്ക് കാര്യങ്ങൾ വേഗത്തിലാക്കാൻ ഇമിഗ്രേഷൻ നയങ്ങളിൽ മാറ്റം വരുത്തണമെന്നും അദ്ദേഹം കൂട്ടിച്ചേർത്തു.
