പി പി ചെറിയാൻ
അറ്റ്ലാന്റ : ആഗോളതലത്തിലെ സംഗീതപ്രേമികൾക്ക് ആത്മീയവും സംഗീതാത്മകവുമായ ഒരു അപൂർവ സായാഹ്നം സമ്മാനിച്ചുകൊണ്ട് “സ്വർഗ്ഗീയ നാദം” മുഖാമുഖം പരിപാടി വിജയകരമായി സമാപിച്ചു. ഇന്ത്യൻ ക്രിസ്തീയ സംഗീതരംഗത്തെ പ്രമുഖ താളവാദ്യകലാകാരനും, ഗാനരചയിതാവും, സംഗീതസംവിധായകനുമായ രാജൻ കോരയുമായി നടത്തിയ സുവർണ്ണ സംഗീത സംവാദം ഏറെ ശ്രദ്ധേയമായി. 2026 ജൂൺ 26, വെള്ളിയാഴ്ച രാത്രി 8.15-ന് സൂം ഓൺലൈൻ പ്ലാറ്റ്ഫോമിലാണ് പരിപാടി അരങ്ങേറിയത്.
പി. പി. ചെറിയാന്റെ പ്രാർത്ഥനയോടെയാണ് പരിപാടികൾക്ക് തുടക്കമായത്. സംഗീത സായാഹ്നത്തിന് അനുഗ്രഹീതമായ ഒരു അന്തരീക്ഷം ഒരുക്കിക്കൊണ്ട് പ്രോഗ്രാം കോർഡിനേറ്റർ സണ്ണി പറവെനത് സദസ്സിനെ സ്വാഗതം ചെയ്തു .
തന്റെ ദീർഘകാല സംഗീത സപര്യയിലെ വിലയേറിയ അനുഭവങ്ങൾ രാജൻ കോര സദസ്സുമായി പങ്കുവെച്ചു. പ്രശസ്ത ഗായകസംഘമായ ക്യാമ്പസ് ക്രൂസേഡ് ഫോർ ക്രൈസ്റ്റിന്റെ “ഹാർട്ട് ബീറ്റ്സ്” സംഗീതസംഘത്തിന്റെ മുൻ അമരക്കാരനായ അദ്ദേഹം (1980-ൽ അംഗമായി, 1992 മുതൽ 2000 വരെ നേതൃത്വചുമതല വഹിച്ചു), ആ സുവർണ്ണകാലത്തെക്കുറിച്ചുള്ള ഓർമ്മകളും ആഗോളതലത്തിൽ നടത്തിയ സംഗീത യാത്രകളെക്കുറിച്ചും വിശദീകരിച്ചു.
സമകാലിക ക്രിസ്തീയ സംഗീതത്തിന്റെ വളർച്ച, സംഗീതത്തിൽ താളവാദ്യങ്ങൾക്കുള്ള പ്രാധാന്യം, ഗാനരചനയിലെയും സംഗീതസംവിധാനത്തിലെയും പുതിയ കാഴ്ചപ്പാടുകൾ എന്നിവയെക്കുറിച്ചുള്ള തന്റെ നിരീക്ഷണങ്ങളും അദ്ദേഹം സദസ്സുമായി പങ്കുവച്ചു .
വരുംതലമുറയ്ക്ക് രാജൻ കോരയുടെ സംഗീത ജീവിതവും അനുഭവങ്ങളും വലിയ പ്രചോദനമാണെന്ന് സംഘാടകർ ആശംസിച്ചു .
മുഖാമുഖത്തോടൊപ്പം പരിപാടിയുടെ ഭാഗമായി നടന്ന ഭക്തിസാന്ദ്രമായ സംഗീത വിരുന്ന് ഏറെ ആസ്വാദ്യകരമായിരുന്നു. പ്രമുഖ ഗായകരായ സണ്ണി, ജോജു, സാബു, സിജി, അജി, ഷൈൻ, മെഴ്സി, റിത്തു , ഇഷാ എന്നിവർ ആലപിച്ച മനോഹരമായ ഗാനങ്ങൾ പരിപാടിയെ കൂടുതൽ സമ്പന്നമാക്കി.
റവ. അലക്സാണ്ടർ തോമസ് സമാപന പ്രാർത്ഥനനടത്തി .
ലോകത്തിന്റെ വിവിധ ഭാഗങ്ങളിലുള്ള സംഗീതപ്രേമികളെ ഒരുമിപ്പിക്കാൻ ഡിജിറ്റൽ പ്ലാറ്റ്ഫോമിലൂടെ സാധിച്ചുവെന്നത് ഈ പരിപാടിയുടെ വലിയ വിജയമായി വിലയിരുത്തപ്പെടുന്നു. വരും ദിവസങ്ങളിൽ “സ്വർഗ്ഗീയ നാദം” പരമ്പരയുടെ അടുത്ത വാല്യങ്ങളിൽ കൂടുതൽ പ്രമുഖരെ ഉൾപ്പെടുത്തി പരിപാടി വിപുലീകരിക്കാനാണ് സംഘാടകരുടെ തീരുമാനം.അലക്സ് തോമസ് പങ്കെടുത്ത എല്ലാവർക്കും നന്ദി അറിയിച്ചു
പരിപാടിയുടെ വിജയത്തിനായി ക്രിയേറ്റീവ് പാർട്ണർ: സജി കൊട്ടാരക്കര,മീഡിയ പാർട്ണേഴ്സ്: പി. പി. ചെറിയാൻ, സി. വി. സാമുവൽ,ടെക്നിക്കൽ സപ്പോർട്ട്: ഡോ. മാത്യു വർഗീസ്, സിജി ആനന്ദ്, സിസ്ലി സണ്ണി,ഓൺലൈൻ പാർട്ണർ: സാംസ് റേഡിയോ യുകെ എന്നിവർ നേതൃത്വം നൽകി .
