തിരുവനന്തപുരം: ഇന്സ്റ്റഗ്രാമിലൂടെ പരിചയപ്പെട്ട ഒമ്പതാംക്ലാസ് വിദ്യാര്ത്ഥിനിയെ പീഡിപ്പിച്ച് ദൃശ്യങ്ങള് പകര്ത്തിയെന്ന പരാതിയില് പ്രതിയെ പൊലീസ് അറസ്റ്റുചെയ്തു. തിരുവനന്തപുരം മണ്ണന്തല പൊലീസ് സ്റ്റേഷന് പരിധിയിലെ മനു എന്നയാളാണ് അറസ്റ്റിലായത്. ഇയാള്ക്കൊപ്പമുണ്ടായിരുന്ന ആളെ കണ്ടെത്താന് അന്വേഷണം ഊര്ജിതമാക്കിയതായി പൊലീസ് പറഞ്ഞു.
പീഡനം സംബന്ധിച്ച് പെണ്കുട്ടി തന്നെയാണ് ചൈല്ഡ് ലൈന് പ്രവര്ത്തകരെ വിവരം അറിയിച്ചതെന്ന് പറയുന്നു. തുടര്ന്ന് ചൈല്ഡ് ലൈന് പ്രവര്ത്തകര് പൊലീസില് വിവരമറിയിക്കുകയായിരുന്നു. ഇന്സ്റ്റഗ്രാമിലൂടെ പരിചയപ്പെട്ട പെണ്കുട്ടിയെ വീട്ടില് ആരുമില്ലാത്ത അവസരത്തില് വീട്ടിലെത്തിയ മനു കയ്യില് കരുതിയിരുന്ന മയക്കുമരുന്ന് കലര്ത്തിയ ജ്യൂസ് നല്കി പീഡിപ്പിക്കുകയായിരുന്നുവെന്നാണ് പെണ്കുട്ടി പൊലീസിനെ അറിയിച്ചത്. പീഡന ദൃശ്യങ്ങള് മൊബൈല് ഫോണില് പകര്ത്തുകയും പിന്നീട് അത് കാട്ടി ഭീഷണിപ്പെടുത്തുകയുമായിരുന്നുവെന്ന് പൊലീസ് പറഞ്ഞു.
