ആലപ്പുഴ: പൊലീസ് കൈകാണിച്ചിട്ടും നിര്ത്താതെ പോയ വാഹനം കുഴിയിലേക്ക് വീണ് കൗമാരക്കാരായ രണ്ടുപേര്ക്ക് പരിക്കേറ്റു. കാരന്തൂര് സ്വദേശി ഷാദില് അലി (18), കുന്നമംഗലം സ്വദേശി നിഹാല് (19) എന്നിവര്ക്കാണ് പരിക്കേറ്റത്. ഷാദിലിന്റെ പരിക്ക് ഗുരുതരമാണെന്നാണ് വിവരം. ഇയാളെ മെഡിക്കല് കോളേജ് ആശുപത്രിയില് പ്രവേശിപ്പിച്ചു. കുന്നമംഗലം മുക്കം റോഡ് ജംക്ഷനില് കഴിഞ്ഞദിവസമാണ് സംഭവം.
യുഡിഎഫ് പ്രവര്ത്തകര് ആഹ്ലാദ പ്രകടനം നടത്തുന്നതിനിടെ നമ്പര് മറച്ച നിലയില് ഒരു വാഹനം ശ്രദ്ധയില്പ്പെട്ട പൊലീസ് കൈകാണിച്ച് നിര്ത്താന് ആവശ്യപ്പെട്ടു. എന്നാല് വാഹനം നിര്ത്താതെ പോയി. പൊലീസ് പിന്തുടര്ന്നതോടെ നിയന്ത്രണം വിട്ട് റോഡരികിലെ കുഴിയില് വീണാണ് അപകടം. മൂന്നുപേരാണ് വാഹനത്തിലുണ്ടായിരുന്നത്. ഒരാള് പരിക്കേല്ക്കാതെ രക്ഷപ്പെട്ടു. വിദ്യാര്ത്ഥികളായ മൂന്നുപേര്ക്കുമെതിരെ കേസെടുത്തതായി പൊലീസ് അറിയിച്ചു.
