ബംഗളൂരു: ബെംഗളൂരുവില്‍ ഓട്ടോ റിക്ഷാ മിനിമം നിരക്ക് 36 രൂപയാക്കി. ആദ്യ രണ്ട് കിലോമീറ്റര്‍ യാത്ര ചെയ്യുന്നതിനുള്ള മിനിമം നിരക്കാണ് വര്‍ധിപ്പിച്ചത്. നേരത്തെ ഇത് 30 രൂപയായിരുന്നു. ആദ്യത്തെ രണ്ടു കിലോമീറ്ററിനുശേഷം പിന്നീടുള്ള ഒരോ കിലോമീറ്ററിനുള്ള നിരക്ക് 15 രൂപയുള്ളത് 18 രൂപയായും വര്‍ധിപ്പിച്ചു. ആഗസ്റ്റ് ഒന്ന് പുതുക്കിയ നിരക്ക് പ്രാബല്യത്തില്‍ വരുമെന്ന് ബംഗളൂരു അര്‍ബന്‍ ജില്ലയിലെ ഡിസ്ട്രിക്ട് ട്രാന്‍സ്‌പോര്‍ട്ട് അതോറിറ്റി അറിയിച്ചു. ബൃഹത് ബെംഗളൂരു നഗര പാലികെ (ബിബിഎംപി) പരിധിയിലായിരിക്കും പുതിയ മീറ്റര്‍ നിരക്ക് ബാധകമാകുക. തിങ്കളാഴ്ചയാണ് റീജ്യണല്‍ ട്രാന്‍സ്‌പോര്‍ട്ട് അതോറിറ്റി ഇതുസംബന്ധിച്ച ഉത്തരവിറക്കിയത്. രാത്രി 10 മുതല്‍ പുലര്‍ച്ചെ 5 വരെ സമയങ്ങളില്‍ യാത്രക്കാരില്‍ നിന്ന് 50% അധികം ഈടാക്കും. ആദ്യത്തെ അഞ്ചുമിനുട്ട് വെയിറ്റിങ് സൗജന്യമായിരിക്കും. അതിനുശേഷമുള്ള ഒരോ പതിനഞ്ച് മിനുട്ടിനും പത്തു രൂപയാണ് വെയിറ്റിങ് ചാര്‍ജ്. യാത്രക്കാര്‍ക്ക് 20 കിലോ വരെയുള്ള ലഗേജ് നിരക്കില്ലാതെ ഓട്ടോയില്‍ കയറ്റി യാത്ര ചെയ്യാം. തോന്നിയതുപോലെ നിരക്കെടുക്കുന്നവര്‍ക്കെതിരെ കര്‍ശന നടപടിയുണ്ടാകുമെന്ന് ഗതാഗത മന്ത്രി രാമലിംഗ റെഡ്ഡി അറിയിച്ചു.