കണ്ണൂര്‍: സഹായധനം കുറഞ്ഞുവെന്ന് ആരോപിച്ച് വൈദികനെ കറിക്കത്തി കൊണ്ട് ആക്രമിച്ചു. പ്രതിയായ വെള്ളരിക്കുണ്ട്, ഭീമനടി സ്വദേശി കുഞ്ഞിമോന്‍ എന്ന മുഹമ്മദ് മുസ്തഫ (69)യെ കണ്ണൂര്‍ സിറ്റി പൊലീസ് ഇന്‍സ്‌പെക്ടര്‍ പി സനല്‍ കുമാറിന്റെ നേതൃത്വത്തില്‍ അറസ്റ്റു ചെയ്തു.
വെള്ളിയാഴ്ച രാവിലെയാണ് സംഭവം. കണ്ണൂര്‍, കണ്ണോത്തും ചാലിലെ ബിഷപ്‌സ് ഹൗസില്‍ എത്തിയ കുഞ്ഞിമോന്‍, ബിഷപ്പ് ഡോ.അലക്‌സ് വടക്കും തലയെ കണ്ട് സഹായം അഭ്യര്‍ത്ഥിക്കുകയായിരുന്നു. ബിഷപ്പ് നിര്‍ദ്ദേശിച്ചതു പ്രകാരം കുഞ്ഞുമോന്‍ അഡ്മിനിസ്‌ട്രേറ്ററുടെ ഓഫീസിലെത്തി സഹായം ഏറ്റുവാങ്ങി. എന്നാല്‍ സഹായത്തുക കുറഞ്ഞു പോയെന്ന് ആരോപിച്ച് കുഞ്ഞിമോന്‍ കറിക്കത്തിയെടുത്ത് ഫാദര്‍ ജോര്‍ജ്ജ് പൈനാടത്തിനെ കുത്തുകയായിരുന്നുവെന്നു കേസില്‍ പറയുന്നു. വലത്തു കൈയ്ക്കും വയറിനും പരിക്കേറ്റ ഫാ. ജോര്‍ജ്ജ് പൈനാടത്ത് ആശുപത്രിയില്‍ ചികിത്സ തേടി. പരിക്ക് ഗുരുതരമല്ല. പ്രതിയെ കണ്ണൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി രണ്ടാഴ്ചത്തേക്ക് റിമാന്റ് ചെയ്തു.
