പത്തനംതിട്ട: തിരുവല്ലയിലെ പെരിങ്ങരയിൽ വിദ്യാർഥികളുമായി പോകുകയായിരുന്ന സ്കൂൾ ബസിന്റെ പിൻവശത്തെ ചക്രങ്ങൾ ഊരിത്തെറിച്ചു. വെള്ളിയാഴ്ച രാവിലെ 9 മണിയോടെ കാവുംഭാംഗം-ചാത്തങ്കരി റോഡിലെ പാലക്കുഴിപടിയിലാണ് സംഭവം. തിരുമൂലപുരം ബാലികാമഠം സ്കൂളിന്റെ ഉടമസ്ഥതയിലുള്ള ബസിന്റെ ചക്രങ്ങളാണ് ഊരിത്തെറിച്ചത്. ഒരു ചക്രം സമീപത്തെ പുരയിടത്തിലേക്ക് 15 മീറ്ററോളം ഉരുണ്ട് പോയി. സമയോചിത ഇടപെടലിലൂടെ ഡ്രൈവർ ബസ് നിർത്തിയതോടെയാണ് വൻ അപകടം ഒഴിവായത്. ബസ് 20 മീറ്ററോളം മുൻപോട്ട് പോയിരുന്നെങ്കിൽ നിയന്ത്രണംവിട്ട് പെരിങ്ങര തോട്ടിലേക്ക് മറിയുമായിരുന്നു. ബസിൽ ഇരുപതോളം വിദ്യാർഥികളുണ്ടായിരുന്നു. ആർക്കും പരുക്കില്ല.