-പി പി ചെറിയാൻ
വാഷിംഗ്‌ടൺ ഡി സി:സൈനിക കേന്ദ്രങ്ങൾ ആക്രമിക്കാനുള്ള പാകിസ്ഥാന്റെ ശ്രമങ്ങൾ ഇന്ത്യ പരാജയപ്പെടുത്തിയെന്ന് യുഎസ് സ്റ്റേറ്റ് ഡിപ്പാർട്ട്‌മെന്റ് വക്താവ് പറഞ്ഞു. സമാധാനത്തിനായി ഇന്ത്യയുമായും പാകിസ്ഥാനുമായും യുഎസ് നിരന്തരം സമ്പർക്കം പുലർത്തുന്നുണ്ടെന്ന് വക്താവ് തുടർന്നു പറഞ്ഞു.
ഇന്ത്യയും പാകിസ്ഥാനും തമ്മിലുള്ള സംഘർഷങ്ങൾ വർദ്ധിച്ചുവരുന്ന സാഹചര്യത്തിൽ, ഇരു രാജ്യങ്ങളും വെടിവയ്പ്പിൽ ഏർപ്പെട്ടിരിക്കുന്നതിനാൽ, സംഘർഷം കൂടുതൽ വഷളാകുന്നില്ലെന്ന് ഉറപ്പാക്കുന്നതിനു യുഎസ് സ്റ്റേറ്റ് സെക്രട്ടറി മാർക്ക് റൂബിയോ ജാഗ്രത പുലർത്തുന്നുണ്ടെന്നു യുഎസ് സ്റ്റേറ്റ് ഡിപ്പാർട്ട്‌മെന്റ് വക്താവ് ടാമി ബ്രൂസ് പറഞ്ഞു.
യുഎസ് സ്റ്റേറ്റ് ഡിപ്പാർട്ട്‌മെന്റ് വക്താവിന്റെ അഭിപ്രായത്തിൽ, മാർക്ക് റൂബിയോ വ്യാഴാഴ്ച രാവിലെ വിദേശകാര്യ മന്ത്രി എസ് ജയ്ശങ്കറുമായും പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫുമായും സംസാരിച്ചു.
സമാധാനത്തിന് മധ്യസ്ഥത വഹിക്കാനും നിലവിലുള്ള സാഹചര്യം വഷളാകാതിരിക്കാനും ഇന്ത്യയുമായും പാകിസ്ഥാനുമായും യുഎസ് നിരന്തരം സമ്പർക്കം പുലർത്തുന്നുണ്ടെന്ന് ബ്രൂസ് പത്രസമ്മേളനത്തിൽ പറഞ്ഞു.
