കണ്ണൂര്‍: സോളാര്‍ പാനല്‍ തലയില്‍ വീണ് ഗുരുതരമായി പരിക്കേറ്റ് ആശുപത്രിയില്‍ ചികിത്സയിലായിരുന്ന ബൈക്ക് യാത്രക്കാരന്‍ മരിച്ചു. തളിപ്പറമ്പ്, കീഴറയിലെ അജിത്ത് ആണ് മരിച്ചത്. കഴിഞ്ഞ ദിവസം വെള്ളിക്കീലില്‍ ഉണ്ടായ അപകടത്തിലാണ് അജിത്തിനു പരിക്കേറ്റത്. ബൈക്കില്‍ സഞ്ചരിക്കുന്നതിനിടയില്‍ കെട്ടിടത്തിനു മുകളില്‍ സ്ഥാപിച്ചിരുന്ന സോളാര്‍ പാനല്‍ ഇളകി ദേഹത്തേക്ക് വീഴുകയായിരുന്നു. ഗുരുതരമായി പരിക്കേറ്റ അജിത്തിനെ ആദ്യം പരിയാരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചിരുന്നു. പരിക്ക് ഗുരുതരമായതിനാല്‍ മംഗ്‌ളൂരുവിലെ ആശുപത്രിയിലേക്ക് മാറ്റിയെങ്കിലും രക്ഷിക്കാനായില്ല.
പ്രമാദമായ അരിയില്‍ ഷുക്കൂര്‍ വധക്കേസിലെ പ്രതിയായ രാധാകൃഷ്ണന്റെ മകനാണ് അജിത്ത്. മകന്റെ മരണവിവരമറിഞ്ഞ് വിചാരണക്കായി കൊച്ചി സിബിഐ കോടതിയിലേക്ക് പോയിരുന്ന രാധാകൃഷ്ണന്‍ നാട്ടിലേക്ക് തിരിച്ചിട്ടുണ്ട്.