ന്യൂഡൽഹി: ലഹരിമരുന്ന് ഉപയോഗിച്ചതിനു ദക്ഷിണാഫ്രിക്കൻ ദേശീയ ക്രിക്കറ്റ് താരം കഗീസോ റബാഡയെ ഐപിഎല്ലിൽ നിന്നു പുറത്താക്കി. ലഹരിമരുന്ന് ഉപയോഗം സ്ഥിരീകരിച്ചതോടെ ഗുജറാത്ത് ടൈറ്റൻസ് ടീം താരത്തെ ഒഴിവാക്കുകയായിരുന്നു. വ്യക്തിപരമായ കാരണങ്ങളെ തുടർന്ന് റബാഡ നാട്ടിലേക്കു മടങ്ങിയെന്നാണ് ടീം അറിയിച്ചിരുന്നത്. എന്നാൽ ലഹരിമരുന്ന് ഉപയോഗം കണ്ടെത്തിയതാണു ഇതിനു കാരണമെന്ന് റബാഡ തന്നെ പ്രസ്താവനയിലൂടെ വെളിപ്പെടുത്തുകയായിരുന്നു. നടപടിയിൽ മാപ്പു ചോദിച്ച താരം ഏറെ വൈകാതെ ക്രിക്കറ്റിലേക്കു തിരികെ എത്തുമെന്നും വ്യക്തമാക്കി.
മെഗാ താരലേലത്തിൽ 10.75 കോടി രൂപയ്ക്കാണ് ഗുജറാത്ത് റബാഡയെ ടീമിലെത്തിച്ചത്. എന്നാൽ ആദ്യ 2 മത്സരങ്ങൾ കളിച്ചതിനു പിന്നാലെ താരം നാട്ടിലേക്കു മടങ്ങുകയായിരുന്നു. ദക്ഷിണാഫ്രിക്കയ്ക്കായി ടെസ്റ്റ്, ഏകദിന, ട്വന്റി 20 ഫോർമാറ്റുകളിൽ റബാഡ കളിച്ചിട്ടുണ്ട്. ടെസ്റ്റിൽ 70 കളികളിൽ 327 വിക്കറ്റാണ് സമ്പാദ്യം. ഏകദിനത്തിൽ 106 കളികളിൽ 168 വിക്കറ്റുകളും ട്വന്റി 20യിൽ 65 കളികളിൽ നിന്നു 71 വിക്കറ്റുകളും സ്വന്തമാക്കി. ഐപിഎല്ലിൽ പഞ്ചാബ് കിങ്സ്, ഡൽഹി ക്യാപിറ്റൽസ് ടീമുകൾക്കായും കളിച്ചു.