ഹൈദരാബാദ്: സുഹൃത്തിനെ കാണാന്‍ വിമാനത്താവളത്തിലേക്ക് പോകുകയായിരുന്ന വിദേശ വനിതയെ കൂട്ടബലാത്സംഗം ചെയ്തു. ജര്‍മന്‍ വനിതയാണ് കൂട്ടബലാത്സംഗത്തിന് ഇരയായത്. മീര്‍പേട്ടില്‍ തിങ്കളാഴ്ച രാത്രിയാണ് സംഭവം. ലിഫ്റ്റ് നല്‍കാമെന്ന് പറഞ്ഞ് ഒരു ക്യാബ് ഡ്രൈവര്‍ യുവതിയെ കാറില്‍ കയറ്റുകയായിരുന്നു. വിമാനത്താവളത്തില്‍ പോകുന്ന വഴി പഹാഡി ഷരീഫിന് സമീപത്ത് ആളൊഴിഞ്ഞ സ്ഥലത്തേക്ക് കൊണ്ടുപോയാണ് ലൈംഗികാതിക്രമം നടത്തിയത്. പന്നീട് രണ്ടു പേരെത്തി തന്നെ ബലാത്സംഗം ചെയ്‌തെന്ന് അതിജീവിത മൊഴി നല്‍കി. പിന്നീട് ഒറ്റപ്പെട്ട സ്ഥലത്ത് തന്നെ ഉപേക്ഷിച്ചെന്നും യുവതി പറയുന്നു. തുടര്‍ന്നാണ് യുവതി ഫോണില്‍ പൊലീസില്‍ പരാതിപ്പെടുന്നത്. ഹൈദരാബാദ് പൊലീസ് കേസെടുത്തു. സിസിടിവി ക്യാമറകള്‍ പരിശോധിച്ച് പ്രതികളെ പിടികൂടാനുള്ള ശ്രമത്തിലാണ് പൊലീസ്. യുവതിയെ വൈദ്യപരിശോധനയ്ക്ക് അയച്ചു. വനിതാ പോലീസ് ഉദ്യോഗസ്ഥരുടെ ഒരു സംഘം അവര്‍ക്കൊപ്പമുണ്ട്. പ്രതിയെ പിടികൂടാന്‍ പ്രത്യേക സംഘങ്ങളെ നിയോഗിച്ചിട്ടുണ്ട്.