കാസര്‍കോട്: നാട്ടിലിറങ്ങുന്ന പുലികളെ കണ്ടെത്തുന്നതിനു സ്ഥാപിച്ച ക്യാമറയില്‍ പുലിയുടെ ചിത്രം പതിഞ്ഞു. വനം വകുപ്പ് അധികൃതര്‍ ഇരിയണ്ണിയില്‍ സ്ഥാപിച്ചിട്ടുള്ള ക്യാമറയിലാണ് കഴിഞ്ഞ ദിവസം ചിത്രം പതിഞ്ഞത്. എന്നാല്‍ ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല. എങ്കിലും തുടര്‍ നടപടികളുടെ ഭാഗമായി പുലിയെ പിടികൂടാന്‍ കൂട് സ്ഥാപിക്കാനുള്ള ആലോചനയിലാണ് അധികൃതര്‍. കഴിഞ്ഞ ദിവസം വീട്ടുമുറ്റത്തെത്തിയ പുലി നിര്‍ത്തിയിട്ടിരുന്ന കാറിനു അടിയില്‍ ഉറങ്ങിക്കിടക്കുകയായിരുന്ന വളര്‍ത്തുനായയെ കടിച്ചു കൊണ്ടു പോയ പാണൂര്‍, തോട്ടത്തുമൂലയിലും ക്യാമറ സ്ഥാപിച്ചിട്ടുണ്ട്.
കാടിറങ്ങിയെത്തുന്ന പുലികള്‍ക്കൊപ്പം പുലിക്കുട്ടികള്‍ ഉള്ളതായും സംശയിക്കുന്നു. കാനത്തൂരില്‍ കാണപ്പെട്ട പുലിക്കൊപ്പം കുട്ടികളും ഉള്ളതായി അന്നു തന്നെ സംശയം ഉയര്‍ന്നിരുന്നു. കുട്ടികള്‍ കൂടെ ഉള്ളതു കൊണ്ടാണ് പുലികള്‍ ഒരേ സ്ഥലത്തു തന്നെ കറങ്ങി നടക്കുന്നതെന്നാണ് പൊതുവെയുള്ള വിലയിരുത്തല്‍.