തിരുവനന്തപുരം: കല്ലമ്പലത്ത് റംബൂട്ടാന് തൊണ്ടയില് കുടുങ്ങി 5 മാസം പ്രായമായ കുഞ്ഞിന് ദാരുണാന്ത്യം. കല്ലമ്പലം കരവാരം തോട്ടയ്ക്കാട് മംഗ്ലാവില് വീട്ടില് അനേഷ് സുധാകരന്റെ മകന് ആദവാണ് മരിച്ചത്. വീട്ടില് പൂജവയ്ക്കുന്നതിനായി വച്ചിരുന്ന പഴങ്ങളില് നിന്നും വല്യച്ഛന്റെ കുട്ടികള് റംബൂട്ടന്റെ തൊലികളഞ്ഞ് കുഞ്ഞിന് കഴിക്കാനായി വായില് വച്ചു കൊടുക്കുകയായിരുന്നു.
കുട്ടികളുടെ കരച്ചില് കേട്ട് ഓടിയെത്തിയ അമ്മ റംബൂട്ടാന് തൊണ്ടയില് കുടുങ്ങി അസ്വസ്ഥത പ്രകടിപ്പിക്കുന്ന കുഞ്ഞിനെയാണ് കണ്ടത്. ഉടന് തന്നെ മാതാവും ബന്ധുക്കളും ചേര്ന്ന് സമീപത്തുള്ള സ്വകാര്യ ആശുപത്രിയിലെത്തിച്ചു. ഡോക്ടര് പരിശോധിച്ച് തൊണ്ടയില് കുടുങ്ങിയ റംബൂട്ടാന് പുറത്തെടുത്തു. പിന്നീട് കുട്ടിക്ക് ശ്വാസം എടുക്കാന് കഴിയാതെ വന്നതോടെ കൃത്രിമ ശ്വാസം നല്കി
തിരുവനന്തപുരം എസ്.എ.ടി. ആശുപത്രിയില് എത്തിച്ച് ഐസിയുവില് പ്രവേശിപ്പിച്ചു. ഡോക്ടര്മാര് സാധ്യമായതെല്ലാം ചെയ്തെങ്കിലും വെള്ളിയാഴ്ച വെളിപ്പിന് മരണം സംഭവിക്കുകയായിരുന്നു.
മൃതദേഹം തിരുവനന്തപുരം മെഡിക്കല് കോളേജ് ആശുപത്രി മോര്ച്ചറിയില് സൂക്ഷിച്ചിരിക്കുകയാണ്.
