പൊക്കിള്ക്കൊടി പോലും മുറിച്ചു മാറ്റാത്ത നവജാത ശിശുവിനെ ഉപേക്ഷിച്ച നിലയില് കണ്ടെത്തി. ഉത്തരകര്ണ്ണാടക, കാര്വാര്, വിജയനഗറിലാണ് സംഭവം. നിരവധി ചെറിയ വീടുകള് ഉള്ള സ്ഥലത്താണ് ഒരു ദിവസം പോലുമാകാത്ത പെണ്കുഞ്ഞിനെ ഉപേക്ഷിച്ച നിലയില് കണ്ടെത്തിയത്. രാവിലെ കുഞ്ഞിന്റെ കരച്ചില് കേട്ടാണ് പരിസരവാസികള് ഉണര്ന്നത്. ഏതെങ്കിലും വീട്ടില് നിന്നാണെന്നാണ് ആദ്യം കരുതിയത്. എന്നാല് കരച്ചില് തുടര്ന്നതു ശ്രദ്ധയില്പ്പെട്ട പരിസരവാസികളില് ചിലര് പരിശോധിച്ചപ്പോഴാണ് വഴിയരുകില് നിലത്ത് കിടത്തിയ നിലയില് ചോരക്കുഞ്ഞിനെ കണ്ടെത്തിയത്. ഉടന് വിവരം പൊലീസിനെ അറിയിച്ചു. പൊലീസെത്തി കുഞ്ഞിനെ കസ്റ്റഡിയിലെടുത്തു ആശുപത്രിയിലേക്ക് മാറ്റി. അവിഹിതത്തില് പിറന്ന കുഞ്ഞിനെ ആരെങ്കിലും ഉപേക്ഷിച്ചതായിരിക്കാമെന്നാണ് സംശയിക്കുന്നത്. സാധാരണ നിലയില് തെരുവുനായകള് കൂട്ടത്തോടെ എത്തുന്ന സ്ഥലത്താണ് കുഞ്ഞിനെ ഉപേക്ഷിച്ചത്. തെരുവു നായകളുടെ ശ്രദ്ധയില് പെടാത്തതിനാലാണ് കുഞ്ഞിന്റെ ജീവന് അപകടത്തില്പെടാതെ രക്ഷപ്പെട്ടത്.
