തിരുവനന്തപുരം: വയനാട് ജില്ലയിലെ മുണ്ടക്കൈ, ചൂരല്മല പ്രദേശത്ത് ഉരുള്പൊട്ടലില് ഒന്നും ബാക്കിയാകാതെ നില്ക്കുന്നവര്ക്ക് മറ്റൊരു വാസസ്ഥലത്തേക്ക് മാറുന്നതിന് സംസ്ഥാന സര്ക്കാര് അടിയന്തര സഹായം നല്കുമെന്ന് മുഖ്യമന്ത്രി പിണറായി വിജയന്. മുണ്ടക്കൈ, ചൂരല് മല പ്രദേശത്തെ ദുരന്തബാധിതരായ എല്ലാവര്ക്കുമാണ് സഹായം ലഭിക്കുക. ജീവനോപാധി നഷ്ടപ്പെട്ട കുടുംബത്തിലെ പ്രായപൂര്ത്തിയായ ഒരു വ്യക്തിക്ക് 300 രൂപ വീതം ദിവസവും നല്കും. ഇങ്ങനെ ഒരു കുടുംബത്തിലെ രണ്ട് വ്യക്തികള്ക്കാണ് ഈ ആനുകൂല്യം ലഭ്യമാവുക. കിടപ്പുരോഗികളോ ആശുപത്രിയില് ദീര്ഘനാള് ചികിത്സയില് കഴിയുന്ന രോഗികളോ ഉള്ള കുടുംബങ്ങള്ക്ക് ഈ ആനുകൂല്യം കുടുംബത്തില് മൂന്ന് പേര്ക്ക് എന്ന നിലയില് നല്കും. 30 ദിവസത്തേക്കാണ് ഈ തുക നല്കുകയെന്ന് മുഖ്യമന്ത്രി പറഞ്ഞു. കൂടാതെ
ഇപ്പോള് ക്യാമ്പില് കഴിയുന്ന ഓരോ കുടുംബത്തിനും അടിയന്തര ധനസഹായമായി പതിനായിരം രൂപ വീതം അനുവദിക്കും. ക്യാംപുകളില് കഴിയുന്നവര്ക്ക് മറ്റൊരു വാസസ്ഥലത്തേക്ക് തിരിച്ചു പോകുമ്പോള്, സര്ക്കാര് ഉടമസ്ഥതയിലോ മറ്റു പൊതു ഉടമസ്ഥതയിലോ മാറാന് കഴിയും വിധമുള്ള താമസ സൗകര്യം ഒരുക്കാനാകുമോ എന്നതില് കളക്ടറുടെ റിപ്പോര്ട്ട് ആവശ്യപെട്ടിട്ടുണ്ട്. കളക്ടറുടെ റിപ്പോര്ട്ട് ലഭിക്കുന്ന മുറയ്ക്ക് വാടക നിശ്ചയിച്ച് അനുവദിക്കുമെന്നും മുഖ്യമന്ത്രി വ്യക്തമാക്കി.
