അമരാവതി: ചാന്ദ്ര ദൗത്യം വിജയിച്ചതിന് പിന്നാലെ സൂര്യനെക്കുറിച്ച് പഠിക്കാനുള്ള ഇന്ത്യയുടെ ആദ്യ ബഹിരാകാശ ദൗത്യമായ ആദിത്യ എൽ1 പേടകം വിക്ഷേപിക്കാനുള്ള കൗണ്ട്ഡൗൺ തുടങ്ങി. ശ്രീഹരിക്കോട്ടയിലെ സതീഷ് ധവാൻ സ്പെയിസ് സെന്ററിൽ നിന്നും പിഎസ്എൽവി സി57 റോക്കറ്റിൽ നിന്നും ശനിയാഴ്ച രാവിലെ 11.50ന് ആണ് വിക്ഷേപിക്കുക. വെള്ളിയാഴ്ച 12.10 നാണ് കൗണ്ട്ഡൗൺ തുടങ്ങിയത്. ഭൂമിയിൽ നിന്നും 15 ലക്ഷം കിലോമീറ്റർ അകലെ സൂര്യനും ഭൂമിക്കും ഇടയിലുള്ള എൽ1 (ലഗ്രാഞ്ച് 1) പോയിന്റിലാണ് പേടകം സ്ഥാപിക്കുക. സൂര്യന്റെ ബാഹ്യഭാഗത്തെ താപവ്യതിയാനം, ബഹിരാകാശ കാലാവസ്ഥ എന്നിവയുടെ പഠനമാണ് ദൗത്യം കൊണ്ട് പ്രധാനമായും ഉദ്ദേശിക്കുന്നത്. അതിന് പുറമെ, സൂര്യന്റെ സങ്കീർണമായ പ്രവർത്തനങ്ങളെ അനാവരണം ചെയ്യാനും സൗരയൂഥത്തെ കുറിച്ച് സുപ്രധാനവിവരങ്ങൾ ലഭ്യമാക്കാനും ഈ ദൗത്യം കൊണ്ട് സാധിക്കുമെന്നാണ് ഇസ്രോ കരുതുന്നത്.