ദേശീയ സ്കൂള് ഗെയിംസില് മെഡല് നേട്ടവുമായി കാസര്കോടുകാരി
കാസര്കോട്: മധ്യപ്രദേശിലെ ബെത്തുലില് നടന്ന ദേശീയ സ്കൂള് തായ്ക്വോണ്ടോ ചാമ്പ്യന്ഷിപ്പില് കേരളത്തിന് വേണ്ടി തന്ബിഹുല് ഇസ്ലാം ഹയര് സെക്കന്ററി സ്കൂളിലെ പത്താം തരം വിദ്യാര്ഥിനി എഎം ഫാത്തിമ വെങ്കല മെഡല് നേടി. തുടര്ച്ചയായി നാലു തവണ സംസ്ഥാന അമേച്ചര് ചാമ്പ്യന്ഷിപ്പുകളില് സ്വര്ണ്ണ മെഡലുകള് കരസ്ഥമാക്കിയിട്ടുള്ള ഫാത്തിമ ഇത്തവണ ആദ്യമായിട്ടാണ് ദേശീയ മത്സരത്തില് പങ്കെടുത്ത് വെങ്കല മെഡല് നേടുന്നത്. ഇന്ത്യയുടെ വിവിധ സംസ്ഥാങ്ങളില് നിന്നായി മുപ്പത്തിയെട്ടോളം മികച്ച താരങ്ങളെ പിന്നിലാക്കിയാണ് ഈ മിടുക്കി മൂന്നാം സ്ഥാനം നേടിയത്. പടുവടുക്കത്തെ പരേതനായ അഡ്വ.അഷ്റഫിന്റെയും ജമീലയുടെയും മകളായ ഫാത്തിമ കാസര്കോട് യോദ്ധ തൈക്വോണ്ടോ അക്കാദമിയില് ജയന് പൊയ്നാച്ചിയുടെ കീഴിലാണ് പരിശീലനം നടത്തുന്നത്. ഏഴ് വയസ്സ് മുതലാണ് ഫാത്തിമ തായ്ക്വോണ്ടോ പഠിക്കാന് തുടങ്ങിയത്. നിരന്തര പരിശീലനവും കഠിന പ്രയത്നവും ആത്മാര്ത്ഥയുമാണ് ഫാത്തിമയെ രാജ്യമാകെ അറിയുന്ന താരമാക്കിയത്